Contract da fusiun Ilanz/Glion (stan 4 da matg 2012)

 Messadi per la votaziun da fusiun dils xx-yy-2012 (stan 4 da matg 2012)

 Declaronza finala dalla cummissiun strategica tiel project da fusiun Glion plus

Ils 30 da settember 2011, ha la cummissiun strategica dil project Glion plus priu per enconuschientscha il conclus dalla regenza. Quel cuntegn il sustegn e las cundiziuns da basa dil project da fusiun. Medemamein ha la cummissiun tractau il rapport da fusiun e decidiu igl agir vinavon.

Conclus dalla regenza
La regenza dil cantun Grischun sustegn ina eventuala fusiun da Castrisch, Duvin, Glion, Ladir, Luven, Pigniu, Pitasch, Riein, Rueun, Ruschein, Schluein, Schnaus, Sevgein e Siat cun 18.3 miu. francs, schinavon che tut las vischnauncas fan part. Vitier vegnan prestaziuns specialas che muntan ensemen ad ulteriurs 5 miu. francs.

Ultra da quei ei la regenza era s’exprimida tier auters impurtonts temas dil project da fusiun:

• La vischnaunca nova ei da menar bilingua, romontsch e tudestg. Affons dallas vischnauncas romontschas han era da visitar el futur scolas romontschas. La vischnaunca nova ha da promover persistent il lungatg romontsch finanzial ed ideal.
• En rama dalla fusiun ei la regenza promta d’agir el manteniment ed optimaziun dils cuors dil traffic public. Oravontut ha ella l’intenziun da mantener tenor pusseivladad las lingias 90.423 Rueun-Pigniu sco era 90.405 Glion-Sevgein (-Riein) sco lingias da traffic regiunal.
• La regenza beneventa il concept da scola proponius dall’organisaziun da project, quei ord vesta giuridica, socialpolitica e pedagogica.  Quei concept prevesa da schar ils loghens dallas scolas cun lur lungatgs d’instrucziun usitai nua ch’els ein.

Ils commembers dalla cummissiun strategica semuossan en general cuntents cul conclus dalla regenza.

Agir vinavon
La cummissiun operativa haveva relaschau il rapport da fusiun per mauns dalla cummissiun strategica. Quei rapport survescha alla cummissiun strategica sco fundament per las lavurs vegnentas. A caschun d’ina secunda informaziun dil pievel ils 10 da december 2011 vegnan las parts dil rapport da fusiun aunc buca publicadas presentadas alla populaziun. Supplementar-mein vegn ina broschura d’informaziun cun questiunari tarmessa en tuttas casadas.